Hættiði þessu væli!

Mér flökrar hreinlega við þessu bulli um mesta tjón sögunnar í skjálftanum í vor og tali um að það þurfi að setja á stað söfnun fyrir Sunnlendinga sem eiga víst að vera í viðstöðulausu kvíðakasti. Ætli það sé nú ekki mest aðskilnaðarkvíði - menn sakni svo draslsins síns. Tjónið er auðvitað svona mikið í krónum talið af því að fólk Á SVO ALLT OF MIKIÐ AF ÖLLU!

ÞAÐ GERÐIST HREINT EKKI NEITT SKELFILEGT - ÞAÐ ERU ALLIR Á LÍFI - ÞAÐ HAFA ALLIR FENGIÐ HÚSASKJÓL - ÞAÐ ER ENGINN SVANGUR!

Andskotans væll er þetta! Hafiði aldrei horft á fréttir??? Hvað með flóð og fellibyli, stríðsátök og hungur sem er viðvarandi ógn í lífi stórs hluta jarðarbúa? það eru alvöru ógnvaldar sem valda hörmungum og dauða.

Reyndar eru það mest Íslendingar aðrir en Sunnlendingar sem eru að reyna að gera eitthvert drama úr þessum skjálfta. Dæmigert reyndar fyrir fólk sem ekki lifir eiginlegar sorgir að vera ofurupptekið af sorgum annarra. Pínulítið svona ámátlegt finnst mér alltaf þegar fólk sefur ekki vegna ástandsins í Tíbet eða Sómalíu en myndi svo aldrei í lífinu stíga fæti á þær grundir þótt þeim gæfist færi á að taka þátt í einhverju alvöru hjálparstarfi á sjálfum staðnum.

Ég gubba á svona spariklæddar kaffihúsa-mótmælenda-týpur. Miklu heiðarlegara að segja bara satt: Mér er mest umhugað um mig og mína og heimur minn er ekki mikið stærri en sem nemur eiginlegri reynslu minni og þeirra sem ég þekki af eigin raun.

Á mínu heimili kallast svona þvaður: Að tala með rassgatinu!

xxx
Fía litla

Athugasemdir

[Ásdís Sigurðardóttir, 19.8.2008 kl. 14:43]

Ætla þá líka að tala íslensku við þig.  Andskotans pirringur er þetta.  Varst þú í skjálftanum???  hvar hafa Sunnlendingar verið að væla og biðja um aðstoð, veit ekki betur en svo að það sem skemmdist sé bætt af tryggingum og var gert um hæl.  Enginn hlutur er svo merkilegur að hann sé ómissandi, nema mannslíf, en það er náttl. ekku hlutur.  Bentu mér á þennan vælugang strax, vil svara fyrir mig.  Annars get ég deilt því með þér að ég var skíthrædd, blokkin mín hoppaði eins og andskotinn og gler flaug um allar trissur. Ég var lengi kvíðin við hávaða en þetta er nú allt að koma, endilega láttu mig heyra frá Fía mín,  mig langar að kynnast svona hetju eins og þér.

[Soffía Valdimarsdóttir, 19.8.2008 kl. 15:00]

Heyrðu ég er innfæddur Hvergerðingur og bý þar enn og upplifði svo sannarlega þennan skjálfta. Og sama má segja um börnin mín sem voru ein sitt í hvoru lagi og voru skelfingu lostin þegar ég loksins komst til þeirra úr vinnunni. það sem fer í taugarnar á mér er það að það eru ýmsir aðrir en einmitt Sunnlendingar að væla og dramatísera í fjölmiðlum þennan atburð sem þeir urðu ekki einu sinni vitni að nema af afspurn.

Ég harma að þú skulir vera hrædd, lítið við því að gera. Vil bara benda fólki á að við sluppum öll lifandi og erum þakklát fyrir það - höfum ekki neina þörf fyrir safnanir eða óþarfa dramatakta í þessu sambandi. Þú misskilur mig illilega ef þú heldur að ég sé að deila á Sunnlendinga eða skjálftaþolendur. En ef þú leitar að hetju þarftu að leita lengra því ég er ekki af þeirri tegund. Þoli bara ekki þessa stofnanasamúð og áhorfendabull.

[Ásdís Sigurðardóttir, 19.8.2008 kl. 15:31]

Ég fann viðtal áðan við einhvern sérfræðing sem telur að það þurfi að rannsaka þessi mál og segir að margir fái ekki helming af því sem skemmst hefur, það finnst mér skjóta skökku við því fólki var lofað að allt yrði bætt og er ég þá að tala um húsakost. SJálfsagt eru einhverjir sem vilja fá hundruð þúsunda fyrir skemmt innbú, en í mínum huga er ekkert svo ómetanlegt að það skipti meira máli en heimili og heilsa.  það er alveg hægt að laga hræðsluna í mér, það kemur smátt og smátt, kannski var ég verri en aðrir vegna þess að ég hef verið mjög lasin og bóndinn líka svo við vorum dálítið bjargarlaus þegar þetta gerðist, en ég var nú ekki að upplifa fyrsta óttann í lífi mínu, aðrar aðstæður hafa veriði mér mun erfiðari og þegar býr í manni mikil sorg þá er grynnra á óttanum.  takk fyrir svarið kann að meta það.  Hetjur þarf ég ekkert að finna, hélt að hér væri á ferð einhver sem hefði aldrei lent í skjálfta, fannst þú skrifa þannig, og ég er einmitt leið á þannig fólki sem vill skilja og segist skilja allt svo vel en hefur ekki hundsvit nema upplifa það sjálft.  Söfnun tel ég algjörlega óþarfa.

[Soffía Valdimarsdóttir, 19.8.2008 kl. 15:47]

Nú þá erum við sammála góða, eins og mér reyndar sýndist í fyrstu. Vona að þú komist yfir óttann - við getum ekki stjórnað náttúrinni en getum reynt að temja hugann.

[Hulda Bergrós Stefánsdóttir, 19.8.2008 kl. 15:52]

Jæja verð að leggja orð í belg, við sem búum á Suðurlandi erum heldur betur búin að bæta við lífsreynslu okkar, en þar sem ég vinn á tiltölulega stórum vinnustað hefur ekki farið fram hjá mér umræðan um viðlagasjóð, þeir sem eiga að bæta húsakost. Þetta hefur tekið óraunverulegan langan tíma hjá þeim.

Eitt dæmi, skjálftarnir urðu 29.maí það eru að verða 3 mánuðir síðan, kona sem vinnur með mér er í húsnæði á vegum viðlagasjóðs til 15.september og það er ekkert farið að gerast í hennar málum húsið hennar er enn óíbúðarhæft !!!!!

Önnur hefur fengið eina heimsókn frá þeim og fékk þá nafnspjald í hönd með símanúmeri með þeim skilaboðum að ef það brestur meira í húsinu þínu (t.d. efri hæðin sígi meira niður) hringdu þá í einum grænum!!!!

Nú er að koma haust og margir hefðu gjarnan viljað vera búnir að koma öllu sínu í stand, en NEI skýrslan frá viðlagasjóði ekki komin og ekkert hægt að gera.

Ég veit að það er ekki nein söfnun sem bjargar þessu fólki, en kommon maður verður að geta verið í öruggu skjóli með sig og sína

[Ásdís Sigurðardóttir, 19.8.2008 kl. 16:00]

Hulda, það er alveg ljóst að þarna eru vondir hlutir í gangi.  Það er skilda okkar að ræða þessi mál og koma þeim á framfæri, láta alla landsmenn vita, eruð þið ekki til í að skrifa grein um þetta önnur hvor ykkar. ? Það má segja að allur almenningur hafi það þokkalega gott en ákveðnir einstaklingar hafi verið sviknir gjörsamlega og ekkert að gerast í þeirra málum.  Hvað segið þið um það??

[Soffía Valdimarsdóttir, 19.8.2008 kl. 16:15]

Nákvæmlega! Heldurðu að það væri ekki nær að beina kröftum sínum að því að leysa mál þeirra sem eru í bráðabirgðarhúsnæði heldur en að rjúka af stað með eitthvað sálfræði-post-drama-rannsóknar-kjaftæði? Það var það sem feykti hattinum af mér í morgun þegar ég kíkti inn á Mbl.is. Auðvitað veit ég að það er ekki á verksviði þeirra sem vilja standa að þessari rannsókn að vinna störf Viðlagasjóðs og pirringurinn því hálf bjánalegur í mínu tilliti - en ég er pirruð samt. Það má vel rannsaka það allt saman mín vegna - gæti jafnvel hugsað mér að gera það sjálf einhvern tíma seinna- en þessi stofnanasamúð sem ég kalla svo er að gera mig brjálaða á meðan einmitt Viðlagasjóður silast hér um bæinn á hraða snigilsins og að því er virðist án nokkurs kerfis. Til dæmis er bílskúrinn hjá foreldrum mínum að hruni kominn og búið að tilkynna það þrisvar sinnum en samt koma þeir ekki en hafa þó komið í flest húsin í kringum þau sem tilkynntu rispað parket og sprungur í pússningu svo eitthvað sé nefnt. það er lán í óláni að gamli er stórslasaður í augnablikinu og getur þess vegna ekki smíðað neitt eða sýslað í skúrnum á meðan hvort eð er. Það býr svo sem enginn í skúrnum en hann er í stöðugri notkun árið um kring.

Annars eru ekki nema 24 byggingar sem þarf að rífa á öllu svæðinu, þar með talin útihús og bílskúrar skilst mér þannig að tjónið er ekki mikið þótt þá fáu svíði vissulega sem hafa ekki húsaskjól.

[Hulda Bergrós Stefánsdóttir, 19.8.2008 kl. 16:21]

Viðlagasjóður vinnur greinilega á ríkisstjórnarhraðanum !!!!

[Ásdís Sigurðardóttir, 19.8.2008 kl. 16:25]

Já, ekta stofnanahraði þarna á ferð því miður.  Ég var nú svo sniðug að laga flísarnar mínar sem á sá, með glæru naglalakki, betra en nýtt og bilar aldrei, svo einn veggur sem þarf að mála, ég hlít að þurfa að mála einhverntíman svo bara eitthvað svona smávægilegt og ég sagði tryggingunum að það væri bara allt ókei. Blokkin er bara 3ja ára þannig að það er eðlilegt að það komi sprungur í gifs veggi svo ég er ánægð að því leiti. Skil engan vegin þennan seinagang og get sko alveg pirrast með þér yfir þessu, því tekur svo langan tíma að leysa málin hjá eigendum þessara 24 húsa?  hvað eru þeir að gera. ?

[Soffía Valdimarsdóttir, 19.8.2008 kl. 17:02]

Tja nú veit ég ekki en hitt er annað og það er stóralvarlegt mál sem þarf að ræða. Ég hef það eftir fagaðila sem kom mikið að mati á skemmdum fyrir Viðlagasjóð árið 2000 að það er allur gangur á því hvort gert er við skemmd hús eftir að bætur hafa verið greiddar út. Skiptir ekki máli kannski þegar skemmdirnar hljóða upp á brotnar flísar eða rispað parket en öllu verra þegar um skemmdir á sökklum eða burðarveggjum er að ræða. Með þessu er víst ekkert eftirlit sem skítur skökku við þar sem um almannafé er að ræða og öryggisatriði í ofanálag. Hver er réttarstaða fólks sem kaupir hús sem hefur skemmst í skjálfta og ekki verið lagað þrátt fyrir bótagreiðslur? Að Viðlagasjóður meti og bæti en fylgi svo ekki málum eftir birtist mér svona svolítið: Hana, hirtu þessa peninga og svo viljum við ekki verða fyrir meira ónæði frá þér á næstunni! Auðvitað á fólk að sjá um þetta sjálft en það gera það bara ekki allir. Veit það ekki, en það er svo margt svona sem manni finnst einkennilegt í meðförum hins opinbera á almannafé.

Eins með öryggismálin, fyrst maður er byrjaður að tjá sig um þetta á annað borð. Í ölfusinu veit ég um skemmu sem er innsigluð en samt í daglegri notkun enda full af vélum og tólum. Sel það ekki dýrara en ég keypti það að í henni er sagður hafa búið vinnumaður fyrir skjálftann og að hann búi þar enn. Auðvitað er það á ábyrgð eigenda og þessa vinnumanns sjálfs að hann skuli ekki virða bannið og setja sig þannig í hættu. En maður spyr sig samt sem áður hvort ekkert eftirlit sé með innsigluðum byggingum í kjölfar svona atburða? Ef satt er að þær séu aðeins á þriðja tug í heildina skyldi maður ðtla að hægt væri að fela lögreglu að ganga úr skugga um að þær séu ekki í notkun.

[Ásdís Sigurðardóttir, 19.8.2008 kl. 17:10]

Get tekið undir þetta með þér Soffía, skrítið að ekki sé neitt eftirlitskerf, það ætti ekki að vera svo vandasamt, við erum ekki að tala um hundruð húsa. Ég hefð sjálfsagt getað látið borga mér málningu og nýjr flísar en þetta er nú svona ákveðin áhætta að stilla upp þungum hlutum og illa festum og svo fer allt í gólfið við hristinginn, allavega hafði ég ekki lyst á að rukka fyrir. Á þessu svæði þarf greinilega að hugsa sig vel um áður en keypt er hús sem lent hefur í skjálfta, ekki víst að allt sé í lagi, en ég vil ítreka, að hið andsk. opinbera á að fylgjast með, við erum nú ekki mörg á þessu skeri okkar.  Kveðja

[Hulda Bergrós Stefánsdóttir, 19.8.2008 kl. 17:56]

Þetta er víst ein af ástæðum seinagangsins hjá þeim, að þeirra sögn það á að fylgja öllu betur eftir, sel það ekki dýrara....

Eins með fólkið sem mátti búa í helmningnum af húsi sínu !!!!

[Heimir Eyvindarson, 20.8.2008 kl. 00:46]

sálfræði-post-drama-rannsóknar-kjaftæði? Þetta er almennilegt.