Skriðan farin af stað og til hamingju með daginn!

Muniði, ég var að tala um sköpun og frjómagn á aðþrengingartímum?

Nú er ballið byrjað.

Spaugstofan aldrei verið betri en tveir síðustu þættir,
endalausar umfjallanir í prentmiðlum um íslenska hönnun sem mun smita út frá sér,
Sjaldan verið jafn oft minnst á íslensku ullina í fjölmiðlum, kosti hennar og sérstöðu eins og undanfarnar vikur.

Að ekki sé minnst á allt grínið á netinu í orðum og myndum.
Hvað haldiði að það hafi margir lært nýjar aðgerðir á tölvurnar sínar í þeirri sköpun allri saman?

Nú hugsar fólk í lausnum og nýtingarmöguleikum.

Og svo það besta - spádómar um að ástandið muni efla íslenska tungu!!!

Til hamingju með daginn gott fólk..........
xxx
Fía litla

Heillandi hugvit

Veistu hvað lopi er?
Lopi er ull sem ekki hefur enn verið spunnin.

Hvað með það segirðu kannski og býst til að gera eitthvað annað en að lesa áfram.
Jú það er svolítið sérstakt við íslenska lopann. Það er lopaprjónið.
Það á sér að öllum líkindum ekki hliðstæðu í heiminum.
Ég hef ekki rekist á neitt í þeim efnum en er að rannsaka málið.
(Láttu mig vita ef þú veist)

Það vildi þannig til að á öðrum áratug tuttugustu aldar hafði kembing ullarinnar flust í litlar ullarvinnslustöðvar en konur héldu áfram að spinna heima. Þær fengu ullina heim kemda í lyppur/lopa og spunnu svo á rokk eða handspunavélar.

Þegar ullarvinnsla og annar heimilisiðnaður var í rénun vegna meðal annars fólksflutninga úr sveit í bæi fækkaði þeim sem kunnu til verka. Þannig gengu rokkar til dæmis úr sér og voru ekki endurnýjaðir.

Þess vegna gerðist það að hugvitið bauð íslenskum konum að reyna að prjóna úr lopanum óspunnum. Nákvæmlega hver eða hvenær það var gert fyrst er ekki vitað. Þannig er það nú einmitt með alla þjóðfræði, hefðirnar eru höfundarlausar og þess vegna svona dásamlega mystískar.

Lopaprjónshefðin varð svo að samfellu í íslenskri þjóðmenningu og lifir nú sem aldrei fyrr.

Dásamlegt ekki satt?
xxx
Fía litla

Að skapa er að lifa

Sit við skriftir og lestur.
Lítil sköpun í gangi þar.

Þarf ekki annað en að snúa mér í hálfhring á stólnum og þá blasir við garnhillan mín og körfurnar.
Ekkert er eins hvílandi og gefandi eins og að handleika garn.

Núna er ég upptekin af lopa, annarri lítið unninni ull og hvers kyns hnöppum.
Var að gera tilraun með að hekla einfaldan plötulopa. Kemur vel út. Endalausir möguleikar!

Á hillunni beint fyrir ofan tölvuna mína liggja þrír litlir hlutir sem eiga hug minn allan þessa dagana. það eru tvær stórar hvítar plasttölur og einn eldgamall málmhnappur ættaður úr töluboxinu hennar Önnu ömmu. Fyrir aftan mig er svo mjög sérstakt tvinnað ullarband sem ég keypti á verksmiðjuútsölu í Noregi árið 1987.

Svo er fólk hissa á því að maður sé upptekinn...........
xxx
Fía litla

Andrými

Á laugardagsmorgnum stöðvast tíminn og lífið tekur á sig annarlegan blæ raunsæis og fantasíu í bland. Línur taka að skýrast á meðan aðrar verða óljósari en nokkru sinni og spurningarnar hrannast upp í kaótískan hrauk í hausnum á mér.

Þá kemur nefnilega Lesbókin með Mogganum.

Þess vegna get ég ekki sagt honum upp.
Svona er ég breisk manneskja

Góða helgi.......
xxx
Fía litla

Sjálfstæði sjálfstæðisins vegna - eða hvað?

Ég hallast æ meir að þeirri hugmynd að sjálfstæði sé meira en lítið afstætt í tilfelli Íslendinga. Höfum við einhvern tíma verið sjálfstæð?
Var það sjálfstæði þegar nýtt lýðveldi þáði og gerði sig háða bæði miklum fjárgjöfum og hernaðarlegri nærveru erlendrar þjóðar?

Hafa Íslendingar nokkurn tíma verið í raun sjálfstæðir nema þessa mánuði sem liðnir eru frá brottför ameríska herliðsins úr Keflavík?

Hvað felst í því að vera sjálfstæð þjóð?
Er það eftirsóknarvert eða yfirleitt gerlegt fyrir 300.000 þúsund manna samfélag?
Eigum við að sækjast eftir því að vera sjálfstæð hvað sem það kostar?
Hvað þýðir sjálfstæðismissir?

Hvað þýðir orðið sjálfstæði eitt og sér? Kannski að standa sjálfur. En þá væntanlega um leið einn og jafnvel óstuddur, eða hvað? Þannig er okkar sjálfstæði alla vega háttað í dag. Við erum svo sannarlega ein og óstudd sem aldrei fyrr.

Eigum við kannski bara að biðja Danmörku að eiga okkur svo Bretarnir taki okkur ekki?
Kannski ekki alveg ónýt hugmynd miðað við það að Færeyjar frændur okkar fá um 400 milljónir danskra króna á ári til vaxtar og viðhalds síns góða samfélags.

Nei ég segi svona - samt kannski eitthvað sem er hollt að skilgreina og hugsa um hver fyrir sig svo við vitum hvað við viljum.
xxx
Fía litla

Lifi byltingin!

Ef við horfum algerlega framhjá því hvaða einstöku einstaklingar verma sæti stjórnar Seðlabankans og skipa stöður Frjármálaefitrlitsins þá er morgunljóst að þetta fólk verður að víkja!

Báðar þessar stofnanir eru rúnar trausti ekki aðeins hérna heima heldur líka meðal annarra þjóða. Það síðarnefnda skiptir í raun meira máli ef við hættum að þverskallast og viðurkennum að við erum ekki eyland nema í landfræðilegum skilningi. Viðhorf og meiningar viðskiptavina okkar um allan heim skipta núna meira máli en stolt okkar og vilji. Svo einfalt er það.

Þess vegna verður að skipta um mannskap í þessum stofnunum. Og það þarf helst að gerast með svolitlum hvelli. Þannig er sett fram ákveðin yfirlýsing þess efnis að festa sé í áformum um að betrumbæta það sem ranglega hefur verið gert.

Bankastjórnirnar urðu að víkja, Seðlabandastjórn og Fjármálaeftirlitstopparnir verða að víkja og sanniði til ríkisstjórnin mun líka víkja frekar fyrr en seinna því hún tekur ekki á málum eins og brottvikningu þeirra sem verða og eiga skilirðislaust að víkja. Ef ekki með góðu þá með illu.

Lifi byltingin!
xxx
Fía litla

Ég elska Pál Óskar!

Hafið þið séð auglýsinguna frá BYR þar sem Páll Óskar sýnir fólki símann sinn?

Í henni segist hann hafa átt sama símann árum saman og sé ekki á þeim buxunum að skipta. Best gæti ég trúað að hann segði þetta satt.

Ég á alla vega verulega erfitt með að sjá hann fyrir mér gera sig ómerkilegan fyrir peninga.
Hann er að mínu mati einn heilsteyptasti þekkti Íslendingurinn - jafnvel fyrr og síðar. Það er búið að vera stórskemmtilegt að fylgjast með honum verða fullorðinn, gera öll mistökin sem við þurfum öll að gera á þeirri leið og aldrei aldrei aldrei bregða út af því hver hann er og fyrir hvað hann stendur.

Þegar fólk saup hveljur yfir Dr. Love og bersögli Palla í kynferðismálum sló ég mér á lær og stappaði í hann stálinu upphátt og í hljóði. Hann gerði gagn og vildi vel. Enginn Íslendingur hefur unnið réttindabaráttu samkynhneigðra jafn mikið gagn og Palli, ekki einu sinni Hörður Torfa.

Málið er að hann var þá og er ekki síður núna ákveðið kennivald meðal unglinga og er í því hlutverki gulls ígildi því hann er frábær fyrirmynd.

Hann lætur engan segja sér hvað eða hvernig hann á að vera
þess vegna elska ég Pál Óskar og óska honum alls hins besta

xxx
Fía litla

Hvað í veröldinni eru þingmennirnir okkar 63 að gera þessa dagana?

Eins og frægt er orðið sagði forstjóri Volo einhverju sinni sem svo að hann treysti sér fyllilega til að stjórna Íslandi í hjáverkum eftir vinnu. Á milli klukkan 5 og 7 þótti honum álitlegur tími sem verkefnið ætti að taka.

Öllu skemmtilegri finnst mér þó sagan af því þegar Siggi nokkur stórbóndi á Vatni í Dölum svaraði því til aðspurður hvort hann hefði tíma frá búskapnum að vera að vinna út í bæ að sauðfjárbúskapur ætti ekki að vera meira mál en að fóðra tvo hamstra!

Með þetta hugarfar ættu þessir tveir að geta komið í stað þeirra 63 sem fara svo afskaplega hægt og hljótt þessa dagana.

xxx
Fía litla

Jólagjöfin í ár.

Einhvern tíma var það Draumalandið eftir Andra Snæ.

Núna er það Brevis Commentarius.

Verkið skrifaði Arngrímur lærði Jónsson gegn ýmsum þeim rangskrifum erlendra manna um Ísland og Íslendinga sem honum þóttu svaraverð. Bókin var gefin út í Kaupmannahöfn undir lok 16. aldar en sú kenning hefur einnig verið á lofti að hún sé skrifuð sem vopn í baráttu Dana við Hansakaupmenn.

Þetta er málið núna. Þurfum að fá smá pepp og það vill svo til að hún er á tilboði hjá Sögufélaginu í Fishersundi einmitt þessa dagana

xxx
Fía litla

Andskotans viðbjóður!

Þegar ég í mesta sakleysi hratt upp útidyrahurðinni í morgun á leið í skólann í blásvartri nóttinni og kvaddi mann og annan í sömu svipan og ég reyndi að detta ekki um einhverja skóna í gangveginum og varna því að gleraugun dyttu aftur á hnakka og þaðan beina leið í gólfið, blasti við mér hálfétin mús á tröppunum beint fyrir utan dyrnar.

Anskotans helvítis viðbjóður þetta kattahald.

Ekki nóg með að þetta sé sporandi allt út hjá manni heldur er allt í hárum og ógeði. Svo kemur þetta veiðieðli í ofanálag.

Um daginn gekk ég inn í myrkvað húsið og skildi ekkert í því af hverju gólfið var hálfþakið fiðri. Þá hafði hann helvískur drepið fugl og skilið eftir á miðju stofugólfi. Og svo núna síðustu vikur hafa þrír músarassar ratað upp að dyrum, hinn helminginn étur bölvaður kötturinn.

Svo vill þetta ógeð upp í rúm til manns og sleikja á manni lappirnar!

Ef kolsvartur köttur verður á vegi ykkar í efra þorpinu þá í guðanna bænum ekki sveigja bílnum framhjá.........
xxx
Fía litla