Hvenær selur maður sál sína og hvenær selur maður ekki sál sína?

Hlægilegur er hann þessi andskotans bægslagangur í Flokksmönnum þessa dagana!

Allir í kappi núna við að vinna sér inn öruggt sæti á jólakortalista Dabba Dubious.

Er þetta ekki sama gengið og sagðist um og fyrir stjórnarslitin síðustu vera svo mikið tilbúið í skipulagsbreytingar í Seðlabankanum? Þau sögðu líka, einhver þeirra að minnsta kosti, að það þýddi jú að Dabbi þyrfti að fara.

Alveg er mér nákvæmlega sama hvað sá maður fer að gera og hvað honum verður borgað í laun fyrir það. Málið er bara að kallinn er algerlega óhæfur í starfið miðað við stöðuna eins og hún er í dag. Við getum ekkert horft framan í alþjóðasamfélagið og ætlast til að njóta þar trausts og brautargengis með afdankaðan kallfausk með úrelt Ba-próf í lögfræði í forsæti seðlabanka landsins.

Fólk eins og Þorgerður Katrín veit þetta og SKILUR þetta. Sumir aðrir hafa greinilega logið því að vilji til nauðsynlegra breytinga væri til staðar.

Svei mér ef þetta lið veit hvenær það lýgur.
Spurningin er svo bara hvort þau viti í raun af hverju og fyrir hvað þau selja sálu sína dag frá degi.

xxx
Fía litla

Hörð gagnrýni á seðlabankafrumvarp

Ekki drepast úr helvítis frekju!

Mikið hef ég reynt að undanförnu í þá átt að temja mér umburðarlyndi - sérstaklega gagnvart þeim sem eru á annarri skoðun en ég sjálf um lífsins gagn og nauðsynjar. (Já, auðvitað er ég að tala um Sjálfstæðisflokkinn)

það hefur gengið svona og svona en satt best að segja hef ég komið sjálfri mér á óvart fyrir það hversu vel mér hefur tekist til á köflum.

En nú er ég alveg dauðans uppgefin á þessari tilraun.
Mér er algerlega misboðið hvernig núverandi stjórnarandstaða ætlar að haga sér í þinginu.
Ég nenni ekki einu sinni að fara í það í smáatriðum.

Langar bara að segja hér út í buskann að ég skil ekki hvað fólkinu gengur til.

Og þó - ég veit alveg nákvæmlega hvað þeim gengur til.
Þau eru í bullandi kosningabaráttu. Dauðfegin að vera laus úr viðjum ráðuneyta sinna geta þau nú verið sá fúli á móti eins og enginn sé morgundagurinn.

Það voru nú ljótu mistökin að slíta þessu stjórnarsamstarfi. Hefðum átt að þrauka fram á vor.
Sáuð þið af þingfundi í gær?
Þinghaldið er orðið að höfundarréttarréttarhöldum. Hverjum er ekki drullusama um það hver nákvæmlega fékk hvaða hugmynd svo fremi sem þær eru útfærðar af réttsýni og heiðarleika og hrint í framkvæmd án tafar þyki þær vænlegar til árangurs?
Og að ekki sé nú talað um muninn að nú skuli fólki vera sagt frá því sem stendur til að gera og líka því sem kemst til eiginlegra verka!

Nei nú bara eykst fylgi Flokksins á meðan alvöru fólk stendur slorið upp í klof staðráðið í að spúla það mesta af dekkinu áður en vaktinni lýkur.
Á meðan garga Sjálfgræðgismenn eins og frekir krakkaandskotar hver upp í annan gjörsamlega vitstola af frekju yfir því að einhverjir skuli hafa vogað sér að falast eftir dótinu.

Ég næ ekki upp í nefið á mér - þið eruð nú ljótu fíflin!
Kunnið þið ekki að skammast ykkar?
Búin að valda svo miklum skaða með oftúlkun og misnotkun á hugmyndafræði ykkar að það sér ekki fram úr ósköpunum og nú heimtið þið skilyrðislaust að fá að halda um valdakeflið áfram.

Það er eitthvað mikið að................
xxx
Fía litla

Pils er ekki pils nema með einföldu sé.

Kallarnir í Grunnskólanum í Hveragerði mæta með bindi á föstudögum og hafa víst gert í allan vetur.
Frá þessu segir í Dagskránni í dag og svo því að krakkarnir séu hrifnir og hafi tekið upp á því að mæta líka með bindi - sko strákarnir. En stelpurnar eru sagðar mæta í pylsum!

Líst ekki alveg á það einhvern vegin............

Annars bara kominn fimmtudagur og ég svona líka ljómandi kát eitthvað í dag. Ekki veit ég hvað veldur en skiptir það nokkru?

xxx
Fía litla

Svei mér þá .......

........ef tími Jóhönnu Sigurðardóttur er ekki bara kominn!
Og þá er ég ekki að vísa til væntanlegs viðtals í Vanity Fair.

Nei ég held nefnilega að kellan ætli að láta verkin tala og leggja dag við nótt til að tryggja að til þeirra verði vandað. Hún er ekkert að skafa utan af því konan sú.

Til hamingju með Jóhönnu kæru Íslendingar og aðrir landsmenn.
Okkar tími er kominn!
xxx
Fía litla

E.S. Blaðamannafundur vikulega í ÞJóðmenningarhúsinu - það eru hlutir að gerast og þeir eru ekki allir augljósir - ónei!

Andskotans.......

........fíflagangur er þetta!

xxx
Fía litla

Yfirlýsingar jaðra við einelti

Stórþrif eina ferðina enn!

Það er líklega við hæfi að óska fólki til hamingju með nýja ríkisstjórn.
Þetta er auðvitað veik stjórn, minnihlutastjórn.

En hún er táknrænt mjög sterk.
Þetta er stjórnin sem rekur endapunktinn á eftir nær 18 ára samfelldri stjórnarsetu Sjálfstæðisflokksins.
Þetta er stjórn sem hefur í heiðri jafnrétti kynjanna.
Þetta er stjórnin sem fyrsti kvenforsætisráðherra Íslands leiðir.
Þetta er stjórn sem lætur skynsemina ráða og sækir nauðsynlega sérfræðiþekkingu út fyrir raðir þingflokka sinna.
Þetta er stjórnin sem við vitum að gæti jafnvel og ekki ólíklega orðið valkostur eftir næstu kosningar með eða án Framsóknar.

Ég ætla nú að leyfa mér þann munað að sjá hvað setur og dæma þessa ríkisstjórn af verkum hennar í stað þess að hafa uppi gífuryrði um væntanlegt gengi hennar. Það er líka lúxus að hafa svona einu sinni til tilbreytingar skýran valkost þegar gengið er til kosninga.

Þetta verður allt að koma í ljós auðvitað en ég sum sé vil óska til hamingju og segja að þó ekki sé annað með þessu fengið en það að koma Sjálfstæðisflokknum frá völdum þá er það hálfur sigur í sjálfu sér sem ber að fagna.

Nú þarf að hreinsa til eftir þá........
xxx
Fía litla

Those Were the Days.......

Við þurfum að vita hvers vegna við fylgjum einhverri tiltekni stefnu áður en við ákveðum að leggjast á sveif með henni.

Ég skil svo vel af hverju Sjálfstæðismenn fylgja og styðja sitt fólk. Það er ekkert sérstakt eða einkennilegt við það þótt ég tali stundum eins og mér sé fyrirmunað að átta mig á heimsku þeirri.

Það er einfaldlega vegna þess að hugsjónin í frjálshyggjunni í sinni tærustu mynd er ósköp falleg. Hún gengur út á mikilvægi hvers einstaklings og þess að hver og einn eigi jafna möguleika til þroska og viðgangs í lífinu.
Hvernig er hægt að segja annað en að þetta séu fallegar og vel meintar hugmyndir?

Málið er bara að þær ganga ekki upp!
Þær ganga ekki upp vegna þess að maðurinn er fyrst og síðast félagsvera!

Peter L. Berger er/var gamall forvígismaður í félagsvísindum sem ég las einhvern tíma í framhaldsskóla á síðustu öld. Hann setti m.a. fram svokallaða Hlutverkakenningu sem er hrein snilld. Hún gengur út á að hver manneskja hafi í raun mörg hlutverk á hverjum tíma, tilheyri mörgum misjöfnum hópum og að hægt sé að greina þessi hlutverk og þannig skilja gang verksins.

Hlutvek frjálshyggjunnar og áherslan á einstaklingshyggjuna var mikilsvert þegar það kom fram á sínum tíma. Sjálfstæðisflokkurinn er til að mynda stofnaður til þess að knýja fram sjálfstæði þjóðar. Hugmyndirnar sem maður les á milli línanna í textum Sjálfsstæðisbaráttunnar eru einmitt þess eðlis að þjóðin sé einstaklingur sem fái ekki notið sín.
Þetta er allt saman gott og blessað.

En svo þegar hagfræðilegur markaðsfasismi og félagslegur Darwinismi er komin í bland við frjálshyggjuna auk þess sem eignarétturinn verður öllum réttindum mikilvægari verður til svo útþaninn og yfirþyrmandi einstaklingshyggja að maðurinn, þessi félagsvera sem hann er fær ekki þrifist.

Hugmyndafræði Sjálfstæðisflokksins er of naív en á sama tíma of langt frá öllu náttúrulegu til að eiga við um lengri tíma.

Takk fyrir Sjálfstæðisbaráttuna - hún var ægilegt æði.
En nú er komið gott!
Önnur gildi en einstaklingshyggja og ægivald eignaréttar þurfa að komast að til að koma jafnvægi á samfélagið.

Gleymum því ekki eins og Berger sagði einhvern tíma að maðurinn er í samfélaginu en samfélagið er líka í manninum.
það verður að vera jafnvægi og eðlilegt flæði hugmynda og lífsgilda.

Við þurfum að stokka upp.
Við þurfum að geta þakkað það sem liðið er og vel gert.
Við þurfum að geta vikið fyrir nýjum hugmyndum og nýju fólki.

Reynum að bera gæfu til þess - saman.
xxx
Fía litla

Nýr miðbær í Hveragerði

Eins og ég sagði ykkurí gær opnar í dag kl. 14:00 í Listasafni Árnesinga sýning á skartgripahönnun og tillögum sem komu inn í hönnunarsamkeppni um nýjan miðbæ í Hveragerði.

Tillögurnar eru glæsilegar. Ég varð alla vega ekki fyrir vonbrigðum þegar ég stalst á smá forsýningu í gær. Í vinningstillögunni eru höfð í heiðri táknkenni bæjarins. Þau tvö megin atriði sem mér sýndust vera helstu kennileiti í menningu bæjarins þegar ég gerði litla þjófræðilega úttekt/rannsókn á viðtölum við 6 mektar Hvergerðinga í fyrravetur eru þar í öndvegi. Þriðja atriðið sem ég læt mig dreyma um á löngum nóttum er líka til staðar í þessari sömu tillögu. Þar vantar bara eitt og ég veit hvað það á að vera..........

Veit ekki hvort ég þarf nokkuð að flytja!!!

Komdu og sjáðu hvernig nýja Hveragerði kemur til með að líta út.
Komdu og sjáðu það sem við höfum nú sameiginlega að stefna að Hvergerðingar.

Listasafn Árnesinga kl. 14:oo í dag
Koma svo!
xxx
Fía litla