Segið ykkur úr Þjóðkirkjunni!

Jæja þá er runninn upp laugardagur fínn og fagur.

Smá hugmynd til ykkar sem eruð ósátt:

Ég hef áður lagt til að fólk segi sig umvörpum úr Samfylkingunni. Nú legg ég tvennt til.
Segið ykkur úr Sjálfstæðisflokknum!
(veit að þetta er mun róttækara en að segja sig úr S þar sem hjarðeðlið er sterkara þarna mengin)

En helst af öllu SEGIÐ YKKUR ÚR ÞJÓÐKIRKJUNNI!

Þetta segi ég ekki bara af því að ég sé svo mikill rebel. Nei heldur vegna þess að þessi stofnun sem þjóðkirkjan er er einn af valdastólpum samfélagsins frá fornri tíð. Þar fyrir utan er hún sterklega tengd íhaldsöflum Vestrænna ríkja bæði sögulega og hugmyndafræðilega.

Þið getið trúað á Jesú Krist alveg bara eins mikið og þið viljið en samt sem áður sagt ykkur áhyggjulaus úr manngerðri stofnun eins og Þjóðkirkjunni. Jesús býr ekki þar!

Að gefa frat í stofnanir er það eina sem við getum gert í stöðunni. Við getum hundsað verslanir og fyrirtæki. Við getum hins vegar ekki snert Alþingi að því er virðist því það hefur verið tekið af þjóðinni. Við þurfum að sætta okkur við að fólkið sem situr þar hefur tekið valdið sem við gáfum því og misnotað það. Við getum ekki hróflað við dómstólum þar sem það er utan okkar lögsögu. Við getum ekki hróflað við neinu sem heyrir undir ráðuneytin af sömu ástæðu.

En við getum gefið skít í batterí eins og Þjóðkirkjuna.
Fjöldaúrsögn myndi skipta máli.
xxx
Fía litla

Þjóðin og fræðin

Þessar vísur sendi hún Tóta frænka mér.
Þær eru einn af þessum textum/afurðum þjóðarinnar sem enginn á en allir skilja. Hverjum sem er er heimilt að taka slíkan texta í sína þjónustu. Enginn takmörk eru fyrir endursköpunarmöguleikunum. þar sem höfundurinn er enginn er frelsið algert.

Svona er þjóðfræði skemmtileg.

.
Glitnisgaur kom fyrstur,
gráðugur í öll bréf.
Hann laumaðist í vasana
og lék með fólksins fé.

Hann vildi sjúga þjóðina,
-þá varð henni ekki um sel,
því greyið var sko afæta,
-það gekk nú ekki vel.

2.
Björgúlfsaur var annar,
með gráa hausinn sinn.
-Hann skreið úr skipi hafsins
og skaust í bankann inn.

Hann faldi sig í Rússlandi
og froðunni stal,
meðan bjórmeistarinn átti
við Yeltsín gamla tal.

3.
Bjármann hét sá þriðji,
böðullinn sá.
Hann krækti sér í milljarða
þegar kostur var á.

Hann hljóp með þá til Noregs
en hirti ekki um sjóðina,
sem féllu hver af öðrum
við sjáum núna slóðina.

4.
Sá fjórði, Bændasleikir,
var fjarskalega sljór.
Og ósköp varð hann leiður,
þegar bankadruslan fór.

Þá þaut hann eins og Welding
og þotuna greip,
og flaug með henni í London
því krónan var svo sleip.

5.
Sá fimmti Smárasnefill,
var skrítið fjármagnsstrá.
-Þegar hinir fengu í nefið
hann barði dyrnar á.

Þeir ruku'upp, til að gá að
hvort gestur væri á ferð.
Þá flýtti' ann sér að pokanum
og fékk sér góðan verð.

6.
Sá sjötti Sigjónárna,
var alveg dæmalaus.-
Hann framundan rústunum
rak sinn ljóta haus.

Þegar fólkið vildi skýringar
á auralausum reikningum,
hann slunginn var að afsaka
og skyldi ei neitt í hlutunum.

7.
Sjöundi var Heiðarmár,
-sá var sjaldan sýndur,
ef fólkið vildi tal af 'onum
hann var alltaf týndur.

Hann var ekki sérlega
hnugginn yfir því,
þó þjóðarskútan maraði
þá hálfu kafi í.

8.
Baugabur, sá áttundi,
var skelfilega þver.
Hann hluta keypt'af bönkunum
með hluta úr sjálfum sér.

Svo lánaði hann sér milljarða
og yfir öðrum gein,
uns stóð hann á blístri
og stundi og hrein.

9.
Níundi var Nógafaur,
næmur á fé og snar.
Hann hentist út um heiminn
og hluti keypti þar.

Á enskum bita sat hann
í símaleik
og át þar hluti drjúga,
enga Breta sveik.

10.
Tíundi var Skallakjaftur,
tungulipur mann,
sem hamaðist á landslýð
og æsti upp hann.

Ef vammlegt var hvergi
né ósiðlegt að sjá,
hann oftast nær seinna
í það reyndi að ná.

11.
Ellefti var Stjórnaskelfir
-aldrei fékk sá kvef,
og hafði þó svo hláleg
og heljarstór eyru og nef.

Ef fnyk af féhyggju
ekki hann fann,
þá léttur, eins og reykur,
lyktina upp spann.

12.
Sólráður, sá tólfti,
kunni að spinna vef.-
Hann þingmannasveitina
sveigði í kosningaþref.

Hann krækti sér í fylgi,
þegar kostur var á.
En stundum reyndist enginn
akkurinn hans þá.

13.
Þrettándi var Kreppugeir,
-þá var komið kvöld,
alltaf kom hann síðastur
á bankahrunsöld.

Hann blekkti litlu börnin sín,
sem mótmæltu prúð og fín,
og trítluðu um bæinn
með spónaspjöldin sín.

xxx
Fía litla

Jólalegt jólafrí!

Ég veit ekki um ykkur en ég er komin í jólafrí frá því fyrir þremur mínútum síðan!
Þarf reyndar að vinna svolítið en það er bara skemmtilegt.

Nú get ég sem sagt farið að græja jólin. Mér minnir að maður setji upp aðventukrans og þrífi jafnvel rúður og gler á þessum árstíma. Eins hef ég heyrt um smákökubakstur og ætla að kynna mér það nánar.

Miðlungurinn minn spurði mig í kvöld hvort ég ætlaði ekki að halda upp á að vera komin í jólafrí. Ég þurfti ekki að hugsa mig um. Ég ætla að fara á fætur í fyrramálið og taka húskofann í gegn!
Það eru forréttindi að geta gert það á meðan aðrir vinna í hausinn á sér eins og almennilegt fólk.

Annars er ég bara brjálæðislega galin og glöð í augnablikinu............
xxxxxxxxxxxxxxxx
xxxxxxxxxx
xxxxxxxxxxxxxxxxxxxxxxxxxxxxxx

XXX
Fía litla

Sumir dagar.......

.......eru öðruvísi.

Dagurinn í dag er held ég einn af þeim.
Það hefur svo margt óvenjulegt gerst í dag og samt er klukkn bara 11:36.

Í dag vaknaði ég á undan eiginmanninum. Eins og það sé nú ekki alveg hreint frímerkilegt útaf fyrir sig þá fór ég líka framúr á undan honum!
Já ég sver að þetta er satt.

Svo fór ég í sturtu, skaust í bakaríið og borðaði morgunmat alein með Mogganum.
Það hefur ekki gerst í einhver ár held ég bara.

Svo var grapesafinn sem ég kreysti í morgun svo brjálæðislega góður að ég er bara alveg sannfærð um að þetta verður einn af þessum dögum. Þegar eitthvað er svona stórkostlegt þá bara getur ekki annað verið en að maður hafi hitt á töfrastund. Þið sem hafið ekki lært að elska grapesafa getið huggað ykkur við að þið eigið þess enn kost að upplifa að minnsta kosti eitt stórkostlegt fyrirbrigði til viðbótar. Það bara bíður eftir ykkur.

Ég sendi ykkur smá augnablik af töfrastundinni minni - núna!
xxx
Fía litla

Er til í að prjóna fyrir blek!

Fór í búðir í dag. Hef ekki gert það lengi. Það var sjokkerandi.

Að lesa um verðhækkanir er ekki það sama og að upplifa þær á buddunni.
Pappír í prentarann kostaði í dag ódýrastur 945 en síðast þegar ég keypti svoleiðis var hann á um 500 kallinn.
Svo ætlaði Jónheiður að kaupa sér gullpenna fyrir jólakortaskrif og önnur huggulegheit. Ódýrasti sem við rákumst á kostaði 685 krónur!

Ég fór fyrst og fremst í ritfangaverslanir af því að mig vantar svo blek í prentarann minn.
Heyrðu það er bara hvergi til!

Í einni búðinni var eftirfarandi tilkynning við blekrekkann: Athugið! Aðeins tvö hylki pr. einstakling.
það er sum sé vöruskortur lika.

Athyglisvert reyndar hvernig áherslurnar breytast eftir samfélagsgerðinni. Nú er það ekki rúgmjöl sem sárlega vantar í hvert kot heldur prentarablek.

En alla vega, er til í að prjóna fyrir prentarahylki af gerðinni HP 21.
Elsk´ykkur öll
xxx
Fía litla

Eitthvað er undarlegt í þessu öllu saman!

Ég hef satt að segja sjaldan verið eins herfilega kjaftstopp og í dag - reyndar í tvígang.
Fyrst þegar ég sá forsíðu Moggans með hótun Davíðs um endurkomu í pólitík og svo þegar fregnir bárust af því að hann bæri fyrir sig bankaleynd.

Nú get ég ekki orða bundist.

Eins hallærislegt og það kann að vera að vera með samsæriskenningar þá bara verð ég að spyrja:
Hvaða tök hefur Davíð Oddsson á valdamiklum einstaklingum þessa lands, svo valdamiklum að það er ekki óhætt að hrófla við honum???

Maðurinn er vissulega fársjúkur og það má ekki vera vondur við aumingja en þetta er orðið gott!
xxx
Fía litla

Bara svona af því að ég veit að þið hafið svo gasalega mikið við þessar upplýsingar að gera.......

.........þá ætla ég rétt sem snöggvast að öskra hérna smá upplýsingar um stöðu mála í turnherberginu.

Er nefnilega í þessum töluðu orðum að ljúga saman síðustu ritgerð annarinnar. Hún á að hafa eitthvað með norræna trú að gera. Okey faire enough eins og konan sagði.

En þar sem mér er gjörsamlega þrotinn allur móður og þessi ritgerð á að vera heldur styttri en ég er vön þá er ég í miklum vanda. Það er ekki svo ýkja mikið mál að ljúga sig út úr 15-20 síðna skrifum. Þá getur maður sagt það í löngu máli sem maður hefur ekki greind eða getu til að sjóða niður í tvær til þrjár málsgreinar.

Það er bara tvennt í stöðunni núna:
Annað er að vera lágstemmdur og einlægur (lesist: láta það sjást í textanum að maður veit ekkert um hvað maður er að þvaðra)
Hitt er að slá um sig með sniðugheitum og kjafthætti (lesist: þetta er aðeins of cheap umræðuefni fyrir mig af því að ég er svo gríðarlega merkileg manneskja og hef þess vegna möguleika á einhverju meira spennandi að gera í kvöld en að röfla um þetta norrænu-trúar-kjaftæði)

Hvort ætli sé vænlegra til árangurs?
xxx
Fía litla

Lögverndaðir perrar og góðir kennarar

Þá hefur enn einn klerkurinn verið sýknaður af kynferðislegri misnotkun á kvenfólki.

Það er ljóti andskotinn hvað það er lögverndað fyrirbrigði að vera perri.
Það er öllu ljótari andskoti hvað það er lögverndað fyrirbrigði að vera prestur.

Suma daga langar mig ekki að vera á fótum. Það er allt ranglátt, ljótt og öfugsnúið. Til hvers að reyna sitt besta í samfélagi sem hampar þeim umfram öðrum sem brjóta af sér?

Samt er glæta þarna einhvers staðar.
Ég geri ráð fyrir því að kennarar svona nokkuð almennt geri sér grein fyrir því hversu mikilvæg stétt þeirra er. Grunar jafnvel að margir hverjir séu í starfinu einmitt af því að á þeirra skólagöngu hafi góður kennari haft þau áhrif að viðkomandi fékk áhuga á að verða sjálfur kennari og hafa jákvæð áhrif á börn.

Í aðstæðum eins og þeim sem ríkja á Íslandi í dag er fólkið sem hugsar um börnin okkar mikilvægara en nokkru sinni áður. Að veita þeim tækifæri til að tjá sig um málefni líðandi stundar og svo aftur að fá útrás í skapandi starfi, það skiptir miklu.

Mín börn koma heim úr skólanum á hverjum degi með eitthvað jákvætt í farteskinu. Dóttir mín til dæmis er í handmennta-lotu núna. Hún kemur heim með nytjahluti í hverri viku sem hún ætlar að gefa í jólagjafir eða notar sjálf. Kannski ekkert nýtt en samt finnst mér ástæða til að ræða svona lagað einmitt núna.

Dótið sjálft er þó ekki það sem skiptir mestu. Það er innrætingin. Hún er til dæmis uppfull af því núna að það sé mjög margt hægt að gera fyrir litla peninga. Saumavélin mín er kominn upp á borð og hún rótar í öllu mínu dóti eftir álitlegu hráefni í meistaraverk.

Sjálf kenndi ég mínum krökkum að prjóna þegar þau voru 5-6 ára en þau tvö yngri uppgötvuðu það í skólanum hvað það er skemmtilegt og gefandi. Það hefur eitthvað með kennsluna eða öllu heldur kennarann að gera. Með því að prjóna eða suma jólagjafir handa vinum og vandamönnum fá börnin þessa dýrmætu hugmynd um að þau séu að gera gagn.

Ég bið ekki um meira - og þó, verð að segja að mér þótti álíka vænt um komment frá syni mínum á dögunum. Hann sagði sem svo að íslenskukennarinn sinn væri: alveg skemmtileg - hún er allavega með eðlilegan húmor!
Skapandi, gefandi og skemmtilegir kennarar, getur þetta orðið eitthvað betra?

xxx
Fía litla

Veit svei mér ekki.......

Mig hefur satt að segja hálft í hvoru langað að setja hér inn hamingjusókir til ykkar allra í tilefni dagsins.
Kem mér ekki í það.
Full kaldhæðið i ljósi aðstæðna..........

Sleppi því þess vegna.

Set í staðinn eina athugasemd eða spurningu sem á í raun betur við:

Hvað ætli þess verði langt að biða að friðsemd borgarana breytist í ófrið og ófriðurinn í ofbeldi?

xxx
Fía litla